پنجشیر ولایت د نوري فایبر له ملي شبکې سره نښلول کیږي
د مخابراتو او معلوماتي ټکنالوجۍ وزارت د لارښوونې او منظورۍ پر اساس، پنجشیر ولایت به ډیر ژر د نوري فایبر ملي شبکې سره ونښلول شي.
د پنجشیر ولایت د مخابراتو او معلوماتي ټکنالوجۍ رئیس ښاغلي عبدالحمید نوري په دې هکله جوړې شوې غونډه کې ویلي، د دې ملي پروژې عملي چارې به په راتلونکې میاشت کې پیل شي او ورسره به هغه سیمې چې پلان کې نیول شؤي نوري فایبر سره وصل شي.
د ښاغلي نوري په وینا، د دې پروژې تطبیق لپاره پلان چمتو او د مخابراتو او معلوماتي ټکنالوجۍ وزیر محترم الحاج مولوي نجیب الله حیات حقاني په ځانګړې لارښوونه، اوس د پلي کېدو په پیل کې ده.
دا پروژه له ګلبهار څخه د پنجشیر ولایت تر بازارک پورې د ۳۶ کیلومترو په اوږوالي دیاد ولایت د شتل، عنابې او رخې ولسوالیو اړونده سیمو کې تطبیقیږي.
د یادونې وړ ده چې د پنجشیر ولایت اوسیدونکو د مخابراتو او معلوماتي ټکنالوجۍ وزارت د مشرتابه له دې اقدام څخه خوښي څرګنده کړې ده او دا پروژه یې په یاد ولایت کې د مخابراتي زیربناوو د پیاوړتیا او ډیجیټل خدمتونو پراختیا لپاره یو مهم ګام وباله.
